An sake bude Masallacin Sarki Faisal a babban birnin kasar Guinea
Kamfanin dillancin labaran kur’ani na iqna ya habarta cewa, ya nakalto daga shafin sadarwa na yanar gizo na Arab News cewa, an bude masallacin sarki Faisal bayan an gyara shi a Conakry babban birnin kasar Guinea.
Masallacin Sarki Faisal na daya daga cikin manya-manyan masallatai a nahiyar Afirka, kuma yana dauke da masallata sama da 12,000.
An sake bude wannan masallaci a ranar Juma'a tare da halartar dimbin masallata.
An gyara masallacin Faisal da taimakon kudi dala miliyan 5 daga kasar Saudiyya.
Jama'a da dama ne suka gudanar da Sallar Juma'a a karkashin jagorancin Sheikh Abdullah al-Jahani, Limamin Masallacin Harami. Da yake jawabi, Sheikh Abdullah ya ce, wannan masallacin wani bangare ne na hadakar masallatai da cibiyoyin addinin Musulunci da kasar Saudiyya ta kafa.
Ya kuma jaddada aniyar kasar Saudiyya na karfafa addinin Musulunci da kafa cibiyoyin Musulunci da inganta addinin Musulunci a fadin duniya. Limamin masallacin al-Haram ya kuma godewa gwamnatin shugaban rikon kwarya ta Guinea Mamdi Domboye bisa goyon bayan da ta bayar a lokacin aikin sake gina kasar.
A shekarar 1982 ne Yarima Saud Al-Faisal tsohon ministan harkokin wajen Saudiyya karkashin Sarki Fahd bin Abdulaziz ya bude masallacin Sarki Faisal na kasar Guinea. A kwanakin baya ne ma'aikatar kula da harkokin addinin musulunci, da'awah da jagoranci ta kasar Saudiyya ta shirya wani kwas na kwanaki hudu a kasar Guinea ga limamai da masu wa'azin wannan kasa.
A watan Satumba ne wata tawaga daga kasar Guinea ta ziyarci dakin buga kur’ani mai tsarki na sarki Fahd da ke Madina. Babban sakatare na wannan rukunin, Atef Al-Alayan, ya bayyana wa tawagar kasar Guinea matakan bugu da tarjama da rarraba kur’ani a tsakanin musulmin duniya. Daga nan sai tawagar ta ziyarci wuraren da aka gina ginin da suka hada da layukan da ake kera kayayyaki, sannan ta samu masaniya da sabbin kayan aiki da fasahohin da ake amfani da su wajen buga kur’ani mai tsarki.
